SASTRA - ILMU - HIKMAH

Oleh
Hamdi Akhsan

Pantun-pantun ini bernuansa ogan,basemah,dan enim. Walau terdapat perbedaan kosa kata,namun dalam banyak hal punya kemiripan. Moga manfaat. Amien!

PANTUN HINDU DUSUN
 Pusake lame tinggalan dulu,
dibawe beperang puyang sengkale.
Terase hindu nak balek kulu,
tapi mesanak lah ngatek gale.

Kereme madinah dipakai ubat,
ubat racun miang beduri.
Kami merantau sude seabad,
tapi dek lengit jati diri.

Tanam dawat di buket gerbe,
 jale tepasang nutop tanah
Tangan dek kuat mbukak himbe,
mangke merantau badan merana.

Jenggale name negeri berasal,
pangeran merantau sampai bekasi.
jujur saje ke jeme asal,
merantau nyakah sesuap nasi.

Ke ulu dibawe ilem suji,
tegakgau kajut tinggal ilemnye.
Kalu jeme ngeluahkan puji,
tanyeilah ape kendaknye.

Hang jebat dudok berangen,
sambel ngihop kupi begule.
Alangkan lebat ujan angen,
teke limek basah gale.

Uleh uleh titek di bungen,
bersehkannye bungen diapus.
Uleh limek kene ujan angen,
saket busong laju bedepus.

Meliok cingkuk dijagal unco,
siamang mude nyemang pagi.
Ai lioh kenan maseh belanco,
mamang lah dekde kebadanan agi.

 PANTUN UGAN JENAKE

Ngulam petai ngan umbut ibul,
ubul ditetak makai uncoh.
Ngape nian ponaan dek nimbul,
tabatnye tekeho lioh belancoh.

ayah terjun ikan begumbul,
ikan mudek mbuat tape.
ibung jum dek galak nimbul,
kalu mang romen maseh betape.

Ihak makan nggok sambal teri,
teri dimasak jeme dihi.
Eni lemak makan gulai tenggiri,
jadilah ai...mamang ngigit jahi.

PANTUN UGAN JENAKE:
Anak jeme pergi mendulang,
emas didulang dapat suase.
Alangkan lemak dipindah tulang,
ngihup kuahnye hase

Ngayau malam ngundang uncoh,
unco dipakai ngapak siamang.
Ngape nian lioh belancoh,
hingat lemaknye sambal kemang.

Ai mamak mbuat ume himbe ditunu,
himbe ditunu mati selayak.
Alangkan lemak petai tunu,
dicolet dengan sambal tempuyak.


anak siamang dicucok hukam,
panek begumbul hae nak gile.
Ati mamang hase agam,
nginak ponaan nimbul gale.

Jual kawe pembeli topi,
topi dikundang ke ayah keho.
Jangankan untok menggendong sapi,
menggendong behas saje telaho

memang nakutkan tega setue,
giginye landap kukunye bise.
memang badan beguyur tue,
tue dirupe mude dihase.

paisan mendire dicampur pede,
untok dimakan ditengah dalu.
ponaan nak tau resepnye mude?
makan kabau wan petai ngkulu.

Asal sial kene beruntun,
ke nenek puyang payu behantau.
jeme ugan pacak bepantun,
kalu bepantun sambil bekuntau

jeme ulu ngantau betutoh,
amen mesanak dek jadi nyusor.
dek ngape adak gumbak huntoh,
mangke alap pecak prupisor.

Tepancing mamang ikan belanak,
pancing ditahek uhat tehantut.
Tande kawin kan banyak anak,
jilalam ponaan neman tekentut.

cerite lucu tentang serundol,
ngajungkan tawe temegigi.
Amen profesor dek galak gundol,
payu lajulah dek begigi.

Menimang bula laju dijunjung,
dijunjung bula dipucok pundak.
mamang curiga romenz menyanjung,
sebelum tau ape kendak.

Caturwulan katik ulangan,
kalu ulangan peneng palaknye.
Care mudah dekde tulangan,
makan dagingnye buang tulangnye

Palak dugan dipampas ilang,
untal ke ayah dekde nimbul.
Pempek ugan ide betulang,
tapi behisi umbot ibul

Pohon kenidai pupoknye gule,
mbeli gule di warung Djayadi.
Pamit kudai nggok gale-gale,
mamang nak balek berije mandi.

tehendam pundok ditumbur badak,
dipucok badak belalang kadak.
tubo galak jeme dek endak,
jeme galak rumen dek andak.

 PANTUN UJUNG BULAN.
Mehame calak disambar katak,
katak nahek sampai tehendam.
Makmane palak dekde butak,
ahini lah tanggal due enam

Mendale ade di ugan ileh,
jemenye baek rajin sembayang.
njale ke ugan dekde buleh,
jadilah gulai kasam kepayang.

Nak nyemberang buloh ditekan,
tekait buloh baju tekuyak.
dek ngatik gulai nak dimakan,
jadilah kian nyulet tempuyak.

Keraton ulu bentoknye megah,
diadapan kebun buah kenidai.
kalu jualan katek yang singgah,
mamang nak nutop lapak kudai.


Inderalaye Desember 2010
Al-Faqir

Hamdi Akhsan.